SL(6)675 – Rheoliadau Newid yn yr Hinsawdd (Cyllideb Garbon) (Cymru) 2025

Cefndir a diben

Mae'r Rheoliadau hyn yn rhan o gyfres o reoliadau a wnaed o dan Ddeddf yr Amgylchedd (Cymru) 2016 (“Deddf 2016”) a elwir yn gyffredin yn Rheoliadau Newid Hinsawdd (Cymru) 2025.

Mae Rhan 2 o'r Ddeddf yn ei gwneud yn ofynnol i Weinidogion Cymru gyrraedd targedau ar gyfer lleihau allyriadau net nwyon tŷ gwydr yng Nghymru.

Mae Adran 31(1) o Ddeddf 2016 yn ei gwneud yn ofynnol i Weinidogion Cymru osod cyllidebau carbon ar gyfer pob cyfnod cyllidebol o 5 mlynedd rhwng 2016 a 2050.

Mae Rheoliad 3 yn pennu’r gyllideb garbon ar gyfer y cyfnod cyllidebol 2031-35 fel ei bod wedi’i chyfyngu ar gyfartaledd o 73% islaw’r llinell sylfaen.

Cyn gosod cyllidebau carbon mewn rheoliadau, rhaid i Weinidogion Cymru ofyn am gyngor y Pwyllgor Newid Hinsawdd, a dwyn y cyngor i ystyriaeth. Ym mis Mai 2025, rhoddodd y Pwyllgor Newid Hinsawdd ei gyngor i Weinidogion Cymru ar lefel pedwerydd cyllideb carbon Cymru ar gyfer y cyfnod pum mlynedd rhwng 2031 a 2035 (“Cyllideb Garbon 4”). Yn y Memorandwm Esboniadol sy'n cyd-fynd â'r Rheoliadau, mae Llywodraeth Cymru yn nodi mai diben y rheoliadau hyn yw derbyn y lefel a argymhellir gan y Pwyllgor Newid Hinsawdd a phennu Cyllideb Garbon 4 ar gyfartaledd o 73% islaw’r llinell sylfaen.

Y weithdrefn

Cadarnhaol Drafft

Mae Gweinidogion Cymru wedi gosod drafft o’r Rheoliadau gerbron y Senedd. Ni chaiff Gweinidogion Cymru wneud y Rheoliadau oni bai bod y Senedd yn cymeradwyo’r Rheoliadau drafft.

Materion technegol: craffu

Nodwyd y pwynt a ganlyn i gyflwyno adroddiad arno o dan Reol Sefydlog 21.2 mewn perthynas â’r offeryn hwn:

1. Rheol Sefydlog 21.2(vi) – ei bod yn ymddangos bod gwaith drafftio'r offeryn neu’r drafft yn ddiffygiol neu ei fod yn methu â bodloni gofynion statudol.

Yn rheoliad 2, defnyddiwyd y term “y Ddeddf” sydd wedi’i ddiffinio yn rhaglith y Rheoliadau hyn. Fodd bynnag, fel y nodwyd ym mharagraff 4.14(5) o Ddrafftio Deddfau i Gymru, nid yw'n bosibl diffinio term yn y rhaglith ar gyfer y darpariaethau gweithredol yng nghorff y

Rheoliadau. Felly, dylid ailadrodd teitl Deddf yr Amgylchedd (Cymru) 2016 yn llawn yn rheoliad 2 o'r Rheoliadau hyn.

Rhinweddau: craffu    

Ni nodwyd unrhyw bwyntiau i gyflwyno adroddiad arnynt o dan Reol Sefydlog 21.3 mewn cysylltiad â’r offeryn hwn.

Ymateb Llywodraeth Cymru

Mae angen ymateb gan Lywodraeth Cymru.

Cynghorwyr Cyfreithiol

Y Pwyllgor Deddfwriaeth, Cyfiawnder a’r Cyfansoddiad

19 Tachwedd 2025